پیوٹن کی ایران کو امریکا سے کشیدگی کم کرنے کیلئے معاونت کی پیشکش
روسی صدر ولادیمیر پیوٹن نے امریکا کے ساتھ کشیدگی کم کرنے کے لیے ایران کو سفارتی معاونت کی پیشکش کردی۔
ایرانی صدر مسعود پزشکیان نے روسی ہم منصب ولادیمیر پیوٹن سے ٹیلیفون پر رابطہ کیا، جس میں روسی صدر نے کہا کہ جامع اسٹریٹیجک شراکت داری کے معاہدے کے تحت دونوں ممالک کے درمیان تعاون جاری رہے گا۔
پیوٹن نے دشمن کی جارحیت کے خلاف ایرانی قوم کی ثابت قدمی کو تاریخی لمحہ قرار دیتے ہوئے کہا کہ یہ دنیا بھر میں لوگوں کی توجہ کا مرکز ہے۔
روسی صدر نے ثالث ممالک کے کردار کا حوالہ دیتے ہوئے کہا کہ روس بھی معاملے کا سفارتی حل چاہتا ہے اور اس مقصد کے لیے اپنا کردار ادا کرنے اور معاونت فراہم کرنے کے لیے تیار ہے۔
دوسری جانب ایرانی صدر مسعود پزشکیان نے کابینہ کے اجلاس سے خطاب کرتے ہوئے کہا کہ ایران کو ہر زاویے سے مکمل جنگ کا سامنا ہے۔ ان کے مطابق ایران اپنے حقوق کے تحفظ کے لیے مذاکرات کی کوششوں کے ساتھ مزاحمت بھی جاری رکھے گا۔
پزشکیان نے کہا کہ بالآخر دشمن کو مایوسی کا سامنا ہوگا۔ انہوں نے داخلی صلاحیتوں پر انحصار کرنے اور ملک کے اندر باہمی تعاون کو مزید بڑھانے پر بھی زور دیا۔
