ریاست خیرپور کے آخری حکمران میر علی مراد خان تالپور انتقال کرگئے
سابق ریاست خیرپور کے آخری حکمران ہزہائینس میر علی مراد خان تالپور دوم 93 برس کی عمر میں انتقال کرگئے۔ اہل خانہ کے مطابق وہ سکھر کے ایس آئی یو ٹی اسپتال میں زیر علاج تھے۔ ان کے صاحبزادے پرنس میر مہدی رضا تالپور نے بھی انتقال کی تصدیق کی ہے۔
میر علی مراد خان تالپور 29 جون 1933 کو برائٹن، انگلینڈ میں پیدا ہوئے۔ انہوں نے ابتدائی تعلیم حیدرآباد کے سینٹ بونا وینچر ہائی اسکول سے حاصل کی، جبکہ اعلیٰ تعلیم برطانیہ کی کیمبرج یونیورسٹی سے حاصل کی۔
وہ 1947 میں محض 14 برس کی عمر میں ریاست خیرپور کے حکمران بنے۔ اسی سال ریاست خیرپور نے پاکستان سے الحاق کا فیصلہ کیا اور میر علی مراد خان اس تاریخی مرحلے میں ریاست کے سربراہ تھے۔
ریاست خیرپور کی الگ ریاستی حیثیت بعد کے برسوں میں ختم ہوگئی اور 1950 کی دہائی میں اسے پاکستان کے انتظامی ڈھانچے میں ضم کردیا گیا۔ اس کے بعد میر علی مراد خان کو ریاست خیرپور کا آخری حکمران قرار دیا جاتا رہا۔
میر علی مراد خان کا تعلق تالپور خاندان سے تھا، جس نے 18ویں صدی کے اواخر میں خیرپور ریاست قائم کی تھی۔ خیرپور میں تالپور دور کی تاریخی شناخت آج بھی فیض محل، کوٹ ڈیجی قلعے اور دیگر تاریخی مقامات کی صورت میں موجود ہے۔ فیض محل تالپور خاندان کی اہم تاریخی رہائش گاہوں میں شمار ہوتا ہے۔
پاکستان کے سرکاری ریکارڈ میں بھی میر علی مراد خان دوم کا بطور ’’میر آف خیرپور‘‘ حوالہ موجود ہے۔
میر علی مراد خان کے انتقال پر ضلع انتظامیہ نے آج ضلع بھر میں عام تعطیل کا اعلان کیا ہے۔ ان کی وفات کو خیرپور کی سابق ریاست، تالپور خاندان اور خطے کی تاریخ کے ایک اہم باب کے اختتام کے طور پر دیکھا جا رہا ہے۔
