چیف الیکشن کمشنر کے خلاف احتجاج، جنتر منتر پر متعدد مظاہرین گرفتار
نئی دہلی میں چیف الیکشن کمشنر گیانیش کمار کے خلاف جنتر منتر پر احتجاج کرنے والے متعدد مظاہرین کو پولیس نے حراست میں لے لیا۔ حراست میں لیے جانے والوں میں طلبہ رہنما نیہا بورا اور سماجی کارکن یوگیندر یادو بھی شامل ہیں۔
مظاہرین چیف الیکشن کمشنر کے استعفے اور انتخابی فہرستوں کی خصوصی نظرثانی کے عمل پر اعتراضات کا اظہار کر رہے تھے۔ پولیس کے مطابق احتجاج کے لیے اجازت نہیں لی گئی تھی، جس کے باعث مظاہرین کو وہاں سے ہٹایا گیا۔
اپوزیشن جماعتوں نے الزام عائد کیا ہے کہ ووٹر فہرستوں میں مبینہ تبدیلیوں سے حکمران بھارتیہ جنتا پارٹی کو انتخابی فائدہ پہنچایا جا سکتا ہے۔ تاہم الیکشن کمیشن نے ان الزامات کو مسترد کرتے ہوئے کہا ہے کہ کمیشن کے تمام فیصلے متفقہ طور پر کیے گئے۔
رپورٹس کے مطابق الیکشن کمشنرز سکھبیر سنگھ سندھو اور وویک جوشی نے گزشتہ 10 ماہ کے دوران انتخابی فہرستوں، ووٹرز کے اندراج اور اخراج، فارم 6 میں تبدیلیوں اور انتخابی ڈیٹا کے انتظام سے متعلق کم از کم 14 مرتبہ اعتراضات اٹھائے۔
نئے ووٹرز کے لیے فارم 6 میں ایسی معلومات شامل کیے جانے پر بھی اعتراض سامنے آیا جس میں درخواست گزار سے اس کے اپنے، والدین یا دادا دادی کے نام سابقہ ووٹر فہرست میں موجود ہونے سے متعلق معلومات طلب کی گئی تھیں۔
