صدر ٹرافی گریڈ ون: تیسرے راؤنڈ کا آغاز کل، کئی ٹیسٹ کرکٹرز ٹیموں میں شامل

صدر ٹرافی گریڈ ون کے تیسرے راؤنڈ کا آغاز جمعرات سے ہوگا، جس میں کئی ٹیسٹ کرکٹرز اور پاکستان انڈر 19 کھلاڑی اپنی محکمانہ ٹیموں کی نمائندگی کریں گے۔

بابر اعظم اور رضا اللہ او جی ڈی سی ایل میں شامل ہوگئے ہیں، جو ایبٹ آباد کرکٹ اسٹیڈیم میں کے آر ایل کے خلاف میچ کھیلے گی۔ پراسرار اسپنر عثمان طارق بھی کے آر ایل کا حصہ بن گئے ہیں۔

دوسرے راؤنڈ میں غنی گلاس کے ہاتھوں شکست کھانے والی ایس این جی پی ایل کو نسیم شاہ اور عبداللہ شفیق کی واپسی سے تقویت ملی ہے۔ پاکستان انڈر 19 کے فرحان یوسف، عبدالصبحان اور حمزہ ظہور بھی ٹیم میں شامل ہوگئے ہیں۔

ایم آئی ٹی سلوشنز نے کے آر ایل کے خلاف گزشتہ میچ میں 158 اوورز کرانے کے بعد فاسٹ بولر عامر جمال کو اسکواڈ میں شامل کرلیا ہے، جبکہ عبداللہ فضل اسٹیٹ بینک آف پاکستان اور سعود شکیل کنگز مین اکیڈمی کا حصہ بن گئے ہیں۔

علی عثمان 2025-26 کے ریکارڈ ساز سیزن کے بعد پہلی مرتبہ پاکستان ٹیلی ویژن کی نمائندگی کریں گے۔ پی ٹی وی نے اب تک دونوں میچ ڈرا کیے ہیں اور کنگز مین اکیڈمی کے خلاف کامیابی حاصل کرنے کی کوشش کرے گی۔

غنی گلاس کے اسکواڈ میں عبید شاہ کی شمولیت سے اس کا پیس اٹیک مزید مضبوط ہوگا۔ شاداب خان اور بائیں ہاتھ کے اسپنر نعمان علی کی چوتھے راؤنڈ سے قبل غنی گلاس میں شمولیت متوقع ہے۔