ایرانی صدر کا پاکستان اور ایران کے درمیان رابطے بڑھانے پر زور

وفاقی وزیر داخلہ محسن نقوی نے تہران میں ایرانی صدر مسعود پزشکیان سے ملاقات کی، جس میں دوطرفہ تعلقات اور تعاون بڑھانے پر گفتگو کی گئی۔

ایرانی صدر نے پاکستان اور ایران کے درمیان مسلسل رابطے بڑھانے پر زور دیتے ہوئے کہا کہ دونوں ممالک تمام شعبوں میں باہمی تعاون مزید مضبوط کرسکتے ہیں۔ ان کا کہنا تھا کہ پاکستان اور ایران مقامی اور علاقائی صلاحیتوں سے اپنی ضروریات پوری کرسکتے ہیں۔

مسعود پزشکیان نے کہا کہ امریکی دباؤ نے مسلم ممالک کے درمیان قربت اور روابط کو مزید فروغ دیا ہے۔

ملاقات میں محسن نقوی نے کہا کہ پاکستان تجارت، معیشت، سیاحت اور سیاست سمیت تمام شعبوں میں ایران کے ساتھ تعاون بڑھانے کے لیے پرعزم ہے۔ پاکستان ثقافت اور سائنس کے شعبوں میں بھی ایران کے ساتھ تعاون مزید وسعت دے گا۔