پاکستان کی جانب سے آسکرز کے لیے ڈاکیومنٹری فلم ’ہینگنگ بائی اے وائر‘ منتخب
پاکستان نے 99ویں اکیڈمی ایوارڈز (آسکرز) کے لیے مو نقوی کی ڈاکیومنٹری فلم ’ہینگنگ بائی اے وائر‘ کو بہترین بین الاقوامی فلم کی کیٹیگری میں باضابطہ نمائندہ فلم منتخب کرلیا۔
یہ پہلا موقع ہے کہ پاکستان نے اس کیٹیگری کے لیے کسی ڈاکیومنٹری کو اپنا نمائندہ بنایا ہے۔
’ہینگنگ بائی اے وائر‘ 2023 میں شمالی پاکستان کے ضلع بٹگرام میں پیش آنے والے کیبل کار حادثے پر مبنی ہے، جس میں 6 سکول کے بچوں سمیت 8 افراد تقریباً 900 فٹ کی بلندی پر کیبل کار میں پھنس گئے تھے۔
حادثے کے بعد کئی گھنٹوں تک جاری رہنے والے ریسکیو آپریشن میں مقامی افراد، ماہرین اور سرکاری اہلکاروں نے حصہ لیا۔ فلم میں حادثے کے عینی شاہدین کی ویڈیوز، زندہ بچ جانے والے افراد کے بیانات اور ریسکیو کارروائی میں شریک افراد کے تجربات شامل کیے گئے ہیں۔
فلم کے ہدایت کار مو نقوی جبکہ تحریر اور پروڈکشن کی ذمہ داری مو نقوی اور بلال سمیع نے انجام دی ہے۔ ڈاکیومنٹری میں مقامی افراد کی جانب سے ریسکیو کوششوں کو بھی نمایاں کیا گیا ہے، جن میں کیبل کار کی مرمت کرنے والے صاحب خان اور زِپ لائن کے سامان کے ساتھ امدادی کارروائی میں حصہ لینے والے علی سواتی شامل ہیں۔
مو نقوی کے مطابق حادثے کی حقیقی ویڈیوز اور مقامی افراد کی جانب سے ریسکیو کی کوششوں کی ریکارڈنگ فلم کا اہم حصہ ہیں۔ ان کا کہنا ہے کہ مشکل حالات میں مقامی لوگوں کی مدد، وسائل پیدا کرنے اور واقعے کو ریکارڈ کرنے کی صلاحیت اس فلم کا مرکزی موضوع ہے۔
’ہینگنگ بائی اے وائر‘ کا پریمیئر رواں سال سن ڈانس فلم فیسٹیول کے ورلڈ سنیما ڈاکیومنٹری مقابلے میں ہوا، جبکہ اسے ٹرائ بیکا، سیئٹل انٹرنیشنل اور سڈنی فلم فیسٹیولز میں بھی پیش کیا جا چکا ہے۔
پاکستان اکیڈمی سلیکشن کمیٹی کی نائب چیئرپرسن ثنا زہرا جعفری نے فلم کے انتخاب کو پاکستانی ڈاکیومنٹری فلم سازی کے لیے تاریخی سنگ میل قرار دیا۔
تاہم فلم کا آسکرز کے لیے انتخاب حتمی نامزدگی کی ضمانت نہیں۔ ’ہینگنگ بائی اے وائر‘ کو نامزد امیدواروں کی حتمی فہرست میں جگہ بنانے کے لیے مزید مراحل سے گزرنا ہوگا۔
