جنوبی افریقا نے 7.6 کلومیٹر طویل مال گاڑی چلا کر عالمی ریکارڈ قائم کردیا
جوہانسبرگ: جنوبی افریقا نے دنیا کی طویل ترین مال گاڑی چلانے کا نیا ریکارڈ قائم کردیا۔ سرکاری ریلوے آپریٹر ٹرانس نیٹ فریٹ ریل نے 7.6 کلومیٹر طویل ٹرین چلا کر یہ اعزاز اپنے نام کیا۔
رپورٹ کے مطابق اس غیر معمولی ٹرین میں 696 خالی بوگیاں شامل تھیں، جبکہ متعدد انجن اور عملے کی بوگیاں بھی اس کا حصہ تھیں۔ ٹرین کو جنوبی افریقا کے لوہا لے جانے والے ریلوے ٹریک پر چلایا گیا۔
اتنی طویل ٹرین کو چلانا اور قابو میں رکھنا ریلوے انتظامیہ کے لیے ایک بڑا تکنیکی اور آپریشنل چیلنج تھا۔ اس دوران بریکنگ اور پاور سسٹمز نے ٹرین کو کنٹرول میں رکھنے میں اہم کردار ادا کیا۔
اس سے قبل دنیا کی طویل ترین مال گاڑی چلانے کا ریکارڈ آسٹریلیا کے پاس تھا، جس نے 2001 میں 682 بوگیوں پر مشتمل ٹرین چلائی تھی۔ جنوبی افریقا کی 696 بوگیوں والی ٹرین نے اس سابقہ ریکارڈ کو پیچھے چھوڑ دیا۔
یہ کامیابی طویل مال گاڑیوں کو چلانے کی صلاحیت اور ریلوے کے تکنیکی نظام میں پیش رفت کی عکاسی کرتی ہے۔
