کراچی ایئرپورٹ پر اے ایس ایف اہلکاروں کے مبینہ ناروا سلوک کا معاملہ سینیٹ کمیٹی میں اٹھا لیا گیا
اسلام آباد: سینیٹ کی قائمہ کمیٹی برائے قواعد و ضوابط و استحقاقات نے کراچی ایئرپورٹ پر ارکان پارلیمنٹ اور دیگر مسافروں کی اسکریننگ کے دوران ایئرپورٹس سیکیورٹی فورس (اے ایس ایف) کے اہلکاروں کے مبینہ ناروا سلوک پر تشویش کا اظہار کرتے ہوئے متعلقہ افسر کو آئندہ اجلاس میں طلب کرلیا۔
سینیٹر سید وقار مہدی کی زیر صدارت اسلام آباد میں ہونے والے کمیٹی اجلاس میں استحقاق سے متعلق مختلف تحاریک کا جائزہ لیا گیا۔
اجلاس میں سینیٹر ثمینہ ممتاز زہری کی جانب سے اے ایس ایف اہلکاروں کے مبینہ ناروا سلوک کے خلاف پیش کردہ تحریک استحقاق پر غور کیا گیا۔ کمیٹی نے گزشتہ ماہ انکوائری رپورٹ طلب کرنے کے لیے بھیجے گئے خط کے جواب کا بھی جائزہ لیا۔
سینیٹر وقار مہدی نے ارکان کو بتایا کہ جواب میں ایسی رپورٹ شامل تھی جس کے مطابق متعلقہ افسر کا تبادلہ کسی دوسری تعیناتی پر کردیا گیا ہے۔
سینیٹر ثمینہ ممتاز زہری نے اے ایس ایف اہلکاروں کے مبینہ ناروا سلوک پر تشویش کا اظہار کرتے ہوئے کہا کہ مسافروں کے ساتھ عزت اور احترام سے پیش آنا ضروری ہے۔
انہوں نے مسافروں کے سامان کی تلاشی لینے کے قانونی جواز پر بھی سوال اٹھایا اور مؤقف اختیار کیا کہ ایسی جانچ پڑتال صرف سیکیورٹی کی ضرورت کے تحت اور قانون کے مطابق ہونی چاہیے۔
سینیٹر ثمینہ ممتاز زہری کے مطابق ابتدائی جواب میں اہلکاروں کے اقدامات کو قانونی قرار دیا گیا تھا، تاہم بعد میں موصول ہونے والی رپورٹ میں متعلقہ افسر کی دوسری جگہ تعیناتی کی تصدیق کی گئی۔
