لاہور ڈویژن میں 13 لاکھ ایکڑ پر گندم کاشت کرنے کا ہدف مقرر
گندم کی بوائی یکم سے 20 نومبر تک ہوگی، کسانوں کو بیج اور کھاد کی فراہمی جاری، نہری پانی کی دستیابی یقینی بنانے کی ہدایت
اجلاس کو بریفنگ میں بتایا گیا کہ لاہور ڈویژن میں گندم کی بوائی یکم سے 20 نومبر 2026 تک ہوگی، جبکہ رواں سال 13 لاکھ ایکڑ رقبے پر گندم کاشت کرنے کا ہدف مقرر کیا گیا ہے۔
کمشنر نعمان یوسف نے محکمہ زراعت اور محکمہ آبپاشی کو ہدایت کی کہ نہری پانی کی دستیابی یقینی بنانے کے لیے باہمی رابطہ برقرار رکھا جائے۔ انہوں نے کہا کہ گندم کی کاشت کے اہداف کی تکمیل اور کسانوں کی مؤثر رہنمائی سے پیداوار کے مقررہ اہداف حاصل کیے جاسکتے ہیں۔
اجلاس کو بتایا گیا کہ گندم کے بیج اور کھادوں کی دستیابی اور فراہمی معمول کے مطابق جاری ہے۔ کمشنر نے کہا کہ حکومت پنجاب کی گندم پرائس پالیسی سے کسانوں کی حوصلہ افزائی ہوگی۔
انہوں نے ڈپٹی کمشنرز کو ’’اپنا کھیت، اپنا روزگار‘‘ پروگرام اور سرکاری اراضی پر گندم کی کاشت کے حوالے سے بھی ہدایات جاری کیں۔
کمشنر لاہور نے فصلوں کی باقیات جلانے کے خلاف سخت کارروائی کا حکم دیتے ہوئے متعلقہ اسکواڈز کو چوبیس گھنٹے فیلڈ مانیٹرنگ یقینی بنانے کی ہدایت کی۔
