چینی کمپنی کا کنگفو روبوٹ متعارف
ذاتی باڈی گارڈ کے طور پر بھی استعمال کیا جا سکے گا
بیجنگ: کیا آپ پسند کریں گے کہ کوئی روبوٹ آپ کے محافظ یا باڈی گارڈ کے طور پر آپ کے ساتھ رہے؟ چین کی ایک کمپنی نے سائنس فکشن کے اس خیال کو حقیقت کا روپ دینے کی کوشش کرتے ہوئے انسان نما کنگفو روبوٹ متعارف کرا دیا ہے۔
انسان نما روبوٹس کی ٹیکنالوجی تیزی سے ترقی کر رہی ہے اور اسی سلسلے میں چینی کمپنی یونی ٹری (Unitree) نے فلمی کردار ’’روبوکوپ‘‘ سے مشابہت رکھنے والا روبوٹ پیش کیا ہے، جسے H2 ایکس کنگفو لیجنڈ کا نام دیا گیا ہے۔
کمپنی کی جانب سے جاری کردہ ویڈیو میں اس روبوٹ کو مختلف کنگفو اور مارشل آرٹس کے مظاہرے کرتے دیکھا جا سکتا ہے۔ روبوٹ نہ صرف مکے مارتا ہے بلکہ مختلف انداز میں لاتیں مارنے اور دیگر پیچیدہ جسمانی حرکات کا مظاہرہ بھی کرتا ہے۔
تاہم، کنگفو کی مہارت سے ہٹ کر تاحال یہ واضح نہیں کہ حقیقی دنیا میں یہ روبوٹ کن عملی مقاصد کے لیے استعمال کیا جا سکے گا۔ کمپنی نے اشارہ دیا ہے کہ اسے ذاتی باڈی گارڈ کے طور پر بھی استعمال کیا جا سکتا ہے، تاہم اس کی حفاظتی صلاحیتوں اور اس حوالے سے عملی کارکردگی کی تفصیلات سامنے نہیں آئیں۔
یونی ٹری نے روبوٹ کی مزید خصوصیات کے بارے میں تفصیلی معلومات جاری نہیں کیں، البتہ کمپنی کے مطابق یہ چار میٹر بلند پلیٹ فارمز سے نیچے چھلانگ لگانے کی صلاحیت رکھتا ہے اور ایک مرتبہ چارج ہونے پر آٹھ گھنٹے تک کھڑا رہ سکتا ہے۔
کمپنی نے اس روبوٹ کی قیمت 29 ہزار 900 امریکی ڈالر مقرر کی ہے۔ جدید روبوٹکس کی دنیا میں یہ پیش رفت اس بات کی عکاسی کرتی ہے کہ انسان نما روبوٹس کو محض تفریح اور صنعتی کاموں تک محدود رکھنے کے بجائے ذاتی معاونت اور ممکنہ حفاظتی مقاصد کے لیے بھی تیار کیا جا رہا ہے۔
