معمر رانا کا ازدواجی زندگی سے متعلق جذباتی بیان، طلاق کے کاغذات پر دستخط کرنے کا انکشاف

پاکستانی فلم انڈسٹری کے سینئر اداکار معمر رانا نے اپنی ازدواجی زندگی کے حوالے سے انکشاف کیا ہے کہ ان کی اہلیہ اور بچے اب ان کے ساتھ نہیں رہتے، تاہم وہ اب بھی دعاگو ہیں کہ ان کا ازدواجی رشتہ ختم نہ ہو۔

ایک حالیہ انٹرویو میں گفتگو کرتے ہوئے معمر رانا نے بتایا کہ وہ زندگی کے مشکل دور سے گزر رہے ہیں۔ ان کے مطابق، اس کٹھن وقت میں ان کے بھائی ان کے ساتھ کھڑے ہیں، لیکن ان کی اہلیہ اور بچے ان سے دور ہو چکے ہیں۔

اداکار نے جذباتی انداز میں کہا کہ وہ آج بھی اپنی اہلیہ اور بچوں سے محبت کرتے ہیں۔ انہوں نے انکشاف کیا کہ وہ طلاق سے متعلق عدالتی دستاویزات پر دستخط کر چکے ہیں، تاہم انہیں اب بھی امید ہے کہ ان کا ازدواجی رشتہ ٹوٹنے سے بچ جائے گا۔

معمر رانا پاکستانی فلم انڈسٹری کے معروف اداکاروں میں شمار ہوتے ہیں۔ انہوں نے اپنے فنی کیریئر کے دوران متعدد فلموں میں کام کیا اور پنجابی تھیٹر میں بھی اپنی اداکاری کے جوہر دکھائے۔

معمر رانا نے 1998 میں مہناز پرویز سے شادی کی تھی۔ دونوں کی شادی کو تقریباً تین دہائیاں گزر چکی ہیں اور ان کی دو بیٹیاں ہیں۔