ہانیہ عامر کو فلم ’’جاناں‘‘ کے ذریعے متعارف کرایا، وہ کامیابی کے لیے بنی تھیں: حریم فاروق
پاکستانی اداکارہ اور پروڈیوسر حریم فاروق نے کہا ہے کہ انہوں نے ہانیہ عامر کی صلاحیتوں کو ابتدائی مرحلے پر پہچان لیا تھا اور 2016 کی رومانوی کامیڈی فلم ’’جاناں‘‘ کے ذریعے انہیں بڑے پردے پر متعارف کرانے کا موقع دیا۔
اپنی آنے والی فلم ’’منگو جٹ‘‘ کے حوالے سے ایک انٹرویو میں حریم فاروق نے فلم پروڈکشن سے اپنی دلچسپی اور ہانیہ عامر کو کیریئر کے آغاز میں موقع دینے کے فیصلے پر گفتگو کی۔
حریم فاروق نے کہا کہ ہانیہ عامر کو فلم انڈسٹری میں متعارف کرانے کا سہرا انہیں جاتا ہے۔ ان کے بقول، ’’وہ کامیابی کے لیے بنی تھیں، انہیں آگے بڑھنا تھا، میں نے بس ان کی صلاحیتوں کو جلد پہچان لیا۔‘‘
2016 میں ریلیز ہونے والی فلم ’’جاناں‘‘ حریم فاروق کی بطور فلم پروڈیوسر پہلی فلم تھی۔ اس فلم کے ذریعے ہانیہ عامر سمیت بلال اشرف اور علی رحمان خان جیسے فنکاروں کو بھی نمایاں ہونے کا موقع ملا۔
حریم فاروق کا کہنا تھا کہ پروڈکشن ان کے لیے محض ایک پیشہ نہیں بلکہ پاکستانی سنیما میں نئے ٹیلنٹ کو آگے لانے اور معیاری کہانیاں پیش کرنے کا ذریعہ بھی ہے۔
انہوں نے بتایا کہ تھیٹر پروڈکشن میں کام کرنے کے باوجود بعض لوگ ان سے پوچھتے ہیں کہ کیا وہ پہلی مرتبہ پروڈکشن کررہی ہیں، حالانکہ تھیٹر کے شعبے میں ان کے کام کو پہلے ہی پہچانا جاتا تھا۔
اداکارہ کے مطابق انہیں ایسی کہانیوں پر کام کرنا پسند ہے جو پاکستانی سنیما میں مثبت کردار ادا کریں اور معاشرے پر بھی اثر ڈالیں۔ ان کا کہنا تھا کہ اگر وہ اپنے ملک کے لیے کچھ کرسکتی ہیں تو انہیں اس موقع سے فائدہ ضرور اٹھانا چاہیے، چاہے اس میں کچھ مشکلات ہی کیوں نہ ہوں۔
حریم فاروق نے 2024 میں دیے گئے ایک انٹرویو میں بھی ہانیہ عامر کے کیریئر میں اپنا کردار ادا کرنے پر اطمینان کا اظہار کیا تھا۔ ان کے مطابق پروڈکشن کے ذریعے وہ اس انڈسٹری کو کچھ واپس دینا چاہتی ہیں جس نے انہیں خود آگے بڑھنے کے مواقع فراہم کیے۔
واضح رہے کہ ہانیہ عامر نے سوشل میڈیا ویڈیوز کے ذریعے ابتدائی شہرت حاصل کی، جس کے بعد انہوں نے ٹیلی ویژن اور فلموں میں اپنی پہچان بنائی۔ فلم ’’جاناں‘‘ ان کے فلمی سفر کا اہم آغاز ثابت ہوئی، جبکہ حریم فاروق کے لیے یہ بطور پروڈیوسر ایک ایسے سفر کی ابتدا تھی جس میں نئے فنکاروں کو مواقع فراہم کرنا اہم ترجیح رہی ہے۔
