لاہور قلندرز کا زمبابوے کے کھلاڑیوں کے اعزاز میں الوداعی عشائیہ، تربیتی پروگرام مکمل

لاہور قلندرز نے اسلام آباد میں پانچ ہفتوں کا تربیتی سیشن مکمل کرنے والے زمبابوے کے کھلاڑیوں کے اعزاز میں الوداعی عشائیے کا اہتمام کیا۔

یہ تربیتی پروگرام زمبابوے کرکٹ اور لاہور قلندرز کے درمیان ایکسچینج پروگرام کا حصہ تھا، جس کے تحت زمبابوے کے کھلاڑیوں کو کرکٹ کی مہارتیں بہتر بنانے اور جدید تربیت حاصل کرنے کا موقع ملا۔

پانچ ہفتوں کے دوران کھلاڑیوں نے کرکٹ کی تربیت کے ساتھ ایک دوسرے کے ساتھ وقت گزارا اور باہمی دوستی و تعلقات کو بھی فروغ دیا۔

تربیتی سیشن کے اختتام پر لاہور قلندرز کی انتظامیہ نے کھلاڑیوں کے لیے خصوصی عشائیے کا اہتمام کیا اور ان کے مستقبل کے لیے نیک خواہشات کا اظہار کیا۔

انتظامیہ کے مطابق یہ پروگرام صرف کرکٹ کی تربیت تک محدود نہیں تھا بلکہ اس سے دونوں ملکوں کے کھلاڑیوں کے درمیان دوستی اور باہمی تعاون کو بھی فروغ ملا۔

پروگرام کے اگلے مرحلے میں پاکستانی کھلاڑی زمبابوے جائیں گے، جہاں انہیں تربیت اور تجربات کے تبادلے کا موقع ملے گا۔