ایف بی آئی کا مطلوب ملزمان اور گرفتاری وارنٹس کا ڈیٹا بیس ہیک کرلیا گیا

امریکی نشریاتی ادارے سی این این کے مطابق ذرائع نے بتایا ہے کہ ہیکرز نے ایف بی آئی کے اس ڈیٹا بیس تک رسائی حاصل کی جسے وفاقی، ریاستی اور مقامی قانون نافذ کرنے والے ادارے مطلوب افراد اور گرفتاری کے وارنٹس کی معلومات حاصل کرنے کے لیے استعمال کرتے ہیں۔
رپورٹ کے مطابق حکام نے تاحال واضح نہیں کیا کہ سائبر حملے میں کون سا ڈیٹا متاثر ہوا ہے، تاہم ایف بی آئی نے واقعے کی تحقیقات شروع کردی ہیں۔ گزشتہ چند ماہ کے دوران ادارے کے نظام پر یہ دوسرا سائبر حملہ ہے۔
ایک سابق ایف بی آئی اہلکار نے خدشہ ظاہر کیا ہے کہ ہیکرز ڈیٹا بیس میں موجود معلومات تبدیل بھی کرسکتے ہیں، جس سے پولیس اور دیگر قانون نافذ کرنے والے اداروں کی کارروائیاں متاثر ہونے کا خطرہ ہے۔ ایف بی آئی نے واقعے پر فوری طور پر کوئی تبصرہ نہیں کیا۔
دوسری جانب امریکی صدر ڈونلڈ ٹرمپ نے انٹرویو کے دوران سائبر حملے سے متعلق سوال پر کہا کہ انہیں ابھی اس واقعے کا علم ہوا ہے اور یہ اچھی خبر نہیں ہے۔
واضح رہے کہ گزشتہ ستمبر میں شائنی ہنٹرز نامی ڈیجیٹل بھتہ خور گروپ نے ایف بی آئی کی ملازمتوں سے متعلق ویب سائٹ تک رسائی حاصل کرلی تھی، جس کے نتیجے میں ادارے کے موجودہ اور سابق ملازمین کا ڈیٹا متاثر ہوا تھا۔



