تین ملکی ون ڈے سیریز: پاکستان نے سری لنکا کو 37 رنز سے شکست دے دی

راولپنڈی: تین ملکی ون ڈے کرکٹ سیریز کے پہلے میچ میں پاکستان نے سری لنکا کو 37 رنز سے شکست دے کر فاتحانہ آغاز کیا۔ پاکستان نے پہلے بیٹنگ کرتے ہوئے 305 رنز بنائے، جواب میں سری لنکن ٹیم 268 رنز پر آل آؤٹ ہوگئی۔

راولپنڈی میں کھیلے گئے میچ میں سری لنکا نے ٹاس جیت کر پہلے فیلڈنگ کا فیصلہ کیا۔ پاکستان کی ٹیم 49.5 اوورز میں 305 رنز بنا کر آؤٹ ہوگئی۔

پاکستان کی پہلی وکٹ 23 رنز پر گری، صائم ایوب 7 رنز بنا کر آؤٹ ہوئے، جبکہ فخر زمان 16 رنز بنا کر پویلین لوٹ گئے۔ تیسری وکٹ 106 رنز پر گری جب بابر اعظم 45 رنز بنا کر آؤٹ ہوئے۔

سلمان علی آغا نے شاندار بیٹنگ کرتے ہوئے 90 گیندوں پر 107 رنز کی اننگز کھیلی۔ سعد بیگ نے 39، حسن نواز نے 37 اور عرفات منہاس نے 18 رنز بنائے۔

سری لنکا کی جانب سے ایشان ملنگا نے 4 وکٹیں حاصل کیں، اسیتھا فرنینڈو نے 3 جبکہ دلشن مدوشانکا نے 2 کھلاڑیوں کو آؤٹ کیا۔

306 رنز کے ہدف کے تعاقب میں سری لنکن ٹیم 48.1 اوورز میں 268 رنز بنا کر آؤٹ ہوگئی۔ سری لنکا کی جانب سے پون رتھنائیکے نے 79، جنیتھ لیاناگے نے 60 اور کمیندو مینڈس نے 44 رنز اسکور کیے۔

پاکستان کی جانب سے شاہین آفریدی نے 3 وکٹیں حاصل کیں، جبکہ نسیم شاہ، حارث رؤف اور فہیم اشرف نے 2،2 کھلاڑیوں کو آؤٹ کیا۔

پاکستان کی جانب سے وکٹ کیپر بیٹر سعد بیگ نے اس میچ میں ون ڈے انٹرنیشنل کرکٹ میں ڈیبیو کیا۔ قومی ٹیم میں کپتان شاہین آفریدی، سعد بیگ، صائم ایوب، فخر زمان، بابر اعظم، حسن نواز، سلمان علی آغا، عرفات منہاس، فہیم اشرف، نسیم شاہ اور حارث رؤف شامل تھے۔

واضح رہے کہ تین ملکی ون ڈے سیریز میں پاکستان اور سری لنکا کے علاوہ انگلینڈ کی ٹیم بھی شریک ہے۔