پنجاب میں 45 ہزار کلومیٹر سڑکوں کی تعمیر کا دعویٰ، مزمل اسلم اور عظمیٰ بخاری آمنے سامنے
لاہور(ہم شہری) وزیراعلیٰ پنجاب مریم نواز کے ڈھائی سال کے دوران صوبے میں 45 ہزار کلومیٹر سڑکیں تعمیر کرنے کے دعوے پر خیبرپختونخوا کے مشیر خزانہ مزمل اسلم اور پنجاب کی وزیر اطلاعات عظمیٰ بخاری کے درمیان ردعمل سامنے آیا ہے۔
مزمل اسلم نے سوال اٹھایا کہ پاکستان کا قومی شاہراہوں کا نیٹ ورک تقریباً 14 ہزار 480 کلومیٹر ہے تو پنجاب میں 45 ہزار کلومیٹر سڑکیں کیسے تعمیر ہوئیں۔ ان کا کہنا تھا کہ مذکورہ دعویٰ قومی شاہراہوں کے مجموعی نیٹ ورک سے تین گنا سے بھی زیادہ بنتا ہے، اس لیے پنجاب میں تعمیر ہونے والی سڑکوں کے روٹس، منصوبوں اور تعمیراتی ریکارڈ کی تفصیلات سامنے آنی چاہئیں۔
دوسری جانب پنجاب کی وزیر اطلاعات عظمیٰ بخاری نے مزمل اسلم کے اعتراض پر کہا کہ صوبوں کے پاس نیشنل ہائی وے اتھارٹی کے نیٹ ورک کے علاوہ اپنی سڑکیں بھی ہوتی ہیں۔ انہوں نے دعویٰ کیا کہ پنجاب کی اپنی سڑکوں کا مجموعی نیٹ ورک تقریباً 80 ہزار کلومیٹر ہے۔
دستیاب سرکاری معلومات کے مطابق نیشنل ہائی وے اتھارٹی قومی شاہراہوں جبکہ صوبائی کمیونیکیشنز اینڈ ورکس محکمے صوبائی سڑکوں کے نیٹ ورک کے ذمہ دار ہیں، اس لیے قومی شاہراہوں کے حجم کا صوبائی سڑکوں سے براہِ راست موازنہ مختلف نوعیت کے نیٹ ورکس کو یکجا کرتا ہے۔
رپورٹس کے مطابق اصل اختلاف اس بات پر ہے کہ 45 ہزار کلومیٹر کا عدد صرف نئی تعمیر ہونے والی سڑکوں کی نمائندگی کرتا ہے یا اس میں مرمت، بحالی اور توسیع کے منصوبے بھی شامل ہیں۔
