راجپال یادو کو تعزیتی تقریب سے نکالنے کی افواہ، اصل ویڈیو نے حقیقت واضح کردی

سوشل میڈیا پر بالی ووڈ اداکار راجپال یادو کی ایک ویڈیو تیزی سے وائرل ہوئی، جس کے بارے میں دعویٰ کیا گیا کہ انہیں معروف اداکار مشتاق خان کی تعزیتی تقریب سے باہر جانے کے لیے کہا جا رہا ہے۔ تاہم بعد میں سامنے آنے والی ایک مکمل ویڈیو سے واقعے کی مختلف حقیقت سامنے آئی۔

مشتاق خان 24 ستمبر کو کینسر کے باعث انتقال کر گئے تھے۔ ان کی یاد میں بدھ کے روز منعقد ہونے والی تعزیتی تقریب میں بالی ووڈ کی متعدد معروف شخصیات نے شرکت کی، جن میں راجپال یادو، راہول رائے، وندو دارا سنگھ، پونم ڈھلون اور گجیندر چوہان سمیت دیگر فنکار شامل تھے۔

وائرل ہونے والی مختصر ویڈیو میں راجپال یادو میڈیا سے گفتگو کرتے دکھائی دیتے ہیں، جبکہ پس منظر میں ایک خاتون کو یہ کہتے ہوئے سنا جا سکتا ہے کہ انہیں وہاں سے بھیج دیا جائے گا اور انہیں پہلے بھی سمجھایا جا چکا ہے۔

سوشل میڈیا پر ویڈیو کے اس مختصر حصے کو اس تاثر کے ساتھ شیئر کیا گیا کہ راجپال یادو کو تعزیتی تقریب سے نکالا جا رہا ہے۔ ویڈیو کے بعد بعض صارفین نے دعویٰ کیا کہ تقریب میں اداکار کی بے عزتی کی گئی۔

تاہم بعد میں سامنے آنے والی مکمل ویڈیو نے معاملے کی مختلف تفصیل پیش کی۔ ویڈیو کے مطابق ایک شخص تعزیتی تقریب کے دوران راجپال یادو کے ساتھ زبردستی سیلفی لینے کی کوشش کر رہا تھا، جس پر وہاں موجود عملے نے اسے ایسا کرنے سے روکا اور وہاں سے ہٹنے کو کہا۔

ویڈیو میں دیکھا جا سکتا ہے کہ مذکورہ شخص فون نیچے رکھ کر معذرت کرتا ہے، جبکہ وہاں موجود میڈیا نمائندوں نے بھی سوال اٹھایا کہ تعزیتی تقریب کے دوران اس طرح تصویر لینے کی کوشش کس حد تک مناسب ہے۔

راجپال یادو نے مشتاق خان کے انتقال سے قبل ان سے اپنی آخری ملاقات کا ذکر بھی سوشل میڈیا پر کیا تھا۔ اداکار کے مطابق وہ مشتاق خان کے انتقال سے تقریباً دو گھنٹے قبل ان سے ملے تھے، جہاں دونوں نے گفتگو کی اور مصافحہ بھی کیا۔

راجپال یادو نے بتایا تھا کہ مشتاق خان اس وقت ان کی باتوں کا جواب دے رہے تھے، اس لیے ان کے اچانک انتقال کی خبر نے انہیں حیران اور غمگین کردیا۔

پیشہ ورانہ طور پر راجپال یادو حالیہ عرصے میں فلم ’حیوان‘ میں بھی نظر آئے، جس میں اکشے کمار اور سیف علی خان سمیت دیگر اداکار شامل ہیں۔ اس کے علاوہ وہ سلمان خان کی آنے والی فلم میں بھی اداکاری کرتے دکھائی دیں گے۔