آئی ایم ایف کا پاکستان سے مالیاتی استحکام اور گردشی قرضہ کم کرنے کا مطالبہ

اسلام آباد: عالمی مالیاتی فنڈ (آئی ایم ایف) نے پاکستان پر زور دیا ہے کہ وہ مالیاتی استحکام برقرار رکھنے اور توانائی کے شعبے میں بڑھتے ہوئے گردشی قرضے کو کم کرنے کے لیے مسلسل اقدامات کرے۔

پاکستان کے دورے پر موجود آئی ایم ایف مشن نے پاکستانی حکام سے کہا کہ مالیاتی استحکام کے لیے اصلاحات جاری رکھی جائیں اور گردشی قرضے کے مسئلے پر قابو پایا جائے۔

مشن نے یہ بھی زور دیا کہ اگر پٹرولیم لیوی میں کمی کی تجویز پر عمل کیا جاتا ہے تو اس کے نتیجے میں ہونے والے ریونیو نقصان کو پورا کرنے کے لیے متبادل ذرائع سے آمدن حاصل کی جائے۔

پاکستانی حکام نے آئی ایم ایف کو یقین دہانی کرائی کہ خلیجی جنگ کے باوجود ساختی اصلاحات کا عمل جاری رکھا جائے گا۔ حکام کے مطابق ایندھن کی قیمتوں میں اضافے کا بوجھ عوام کو منتقل کیا جائے گا، تاہم کم آمدن والے اور کمزور طبقات کے لیے ہدفی سبسڈیز بھی فراہم کی جائیں گی۔