مقبوضہ جموں و کشمیر اسمبلی نے مکمل ریاستی حیثیت کی بحالی کی قرارداد منظور کرلی

مقبوضہ جموں و کشمیر اسمبلی نے وزیراعلیٰ عمر عبداللہ کی جانب سے پیش کی گئی مکمل ریاستی حیثیت کی فوری بحالی کی قرارداد منظور کرلی۔ قرارداد پر بحث کے دوران بی جے پی ارکان نے شدید احتجاج کیا اور بعد ازاں ایوان سے واک آؤٹ کردیا۔

رپورٹس کے مطابق قرارداد میں بھارت کی حکومت سے جموں و کشمیر کو فوری طور پر مکمل ریاست کا درجہ بحال کرنے کا مطالبہ کیا گیا ہے۔ قرارداد کو صوتی ووٹ کے ذریعے منظور کیا گیا۔

بی جے پی ارکان نے قرارداد میں 2019 سے قبل کی خودمختاری اور خصوصی حیثیت کے حوالوں پر اعتراض کیا، جبکہ ایوان میں احتجاج، نعرے بازی اور قرارداد کی نقول پھاڑنے کے واقعات بھی پیش آئے۔

قرارداد میں 2000 اور نومبر 2024 میں منظور کی گئی سابقہ قراردادوں کا بھی حوالہ دیا گیا ہے۔ بعض ارکان کی جانب سے آرٹیکل 370، آرٹیکل 35 اے اور سابقہ خصوصی حیثیت سے متعلق ترامیم کی تجاویز بھی سامنے آئیں، تاہم حتمی قرارداد کا بنیادی مطالبہ مکمل ریاستی حیثیت کی بحالی رہا۔