یو این مشن کا دعویٰ: ایران میں 2 امریکی حملوں میں جنگی جرائم کے شواہد ملے
جنیوا: اقوام متحدہ کے آزاد بین الاقوامی فیکٹ فائنڈنگ مشن نے کہا ہے کہ ایران میں 2026 کے دوران کیے گئے دو امریکی فضائی حملوں کے حوالے سے جنگی جرائم کے ارتکاب پر یقین کرنے کے لیے معقول بنیادیں موجود ہیں۔ مشن کے مطابق ان حملوں میں مناب کے ایک اسکول اور لامرد کے اسپورٹس کمپلیکس کو نشانہ بنایا گیا۔
رپورٹ کے مطابق مناب میں شجرہ طیبہ پرائمری اسکول پر ہونے والے حملے میں بڑی تعداد میں شہری، جن میں بچے بھی شامل تھے، ہلاک ہوئے، جبکہ لامرد اسپورٹس کمپلیکس پر حملے میں بھی شہریوں کی ہلاکتیں ہوئیں۔ فیکٹ فائنڈنگ مشن کے مطابق دونوں مقامات واضح طور پر شہری تنصیبات تھے۔
رپورٹ میں امریکی حملوں سے مجموعی طور پر کم از کم 178 شہریوں کی ہلاکت کا ذکر کیا گیا ہے۔ مشن نے ان واقعات کو بین الاقوامی انسانی قانون کے تحت جنگی جرائم کے زمرے میں آنے کے حوالے سے معقول بنیادیں قرار دیا۔
دوسری جانب امریکی حکام نے اقوام متحدہ کی رپورٹ کے نتائج کو مسترد کیا ہے۔ رپورٹ میں ایران کے اندر احتجاجی مظاہروں کے خلاف کارروائیوں سے متعلق ایرانی حکام پر بھی انسانیت کے خلاف جرائم کے الزامات کا ذکر کیا گیا ہے۔
اقوام متحدہ کے انسانی حقوق کے ریکارڈ کے مطابق مناب میں 28 فروری 2026 کو ایک اسکول پر بمباری کے حوالے سے پہلے بھی شہری ہلاکتوں اور بین الاقوامی انسانی حقوق و انسانی قانون سے متعلق سنگین خدشات کا اظہار کیا گیا تھا۔
