امریکا حوثیوں سے براہِ راست بات چیت کر رہا ہے، جے ڈی وینس
امریکی نائب صدر جے ڈی وینس نے تصدیق کی ہے کہ امریکا یمن کے حوثیوں کے ساتھ براہِ راست رابطے میں ہے، جبکہ واشنگٹن سعودی عرب، متحدہ عرب امارات اور خطے کے دیگر متاثرہ ممالک سے بھی مسلسل مشاورت کر رہا ہے۔
قطری نشریاتی ادارے الجزیرہ کے مطابق جے ڈی وینس نے کینساس سٹی میں انتخابی ریلی سے قبل صحافیوں سے گفتگو کرتے ہوئے کہا کہ امریکی حکومت حوثیوں سے براہِ راست بات چیت کر رہی ہے۔ تاہم انہوں نے مذاکرات کی نوعیت، مقام یا اس میں شامل افراد سے متعلق مزید تفصیلات نہیں بتائیں۔
امریکی نائب صدر نے میون جزیرے پر حوثیوں کے کنٹرول پر بھی تشویش کا اظہار کیا۔ یہ جزیرہ آبنائے باب المندب کے قریب واقع ہے اور بحیرہ احمر و خلیج عدن کے درمیان اہم بحری راستے کے حوالے سے اسٹریٹجک اہمیت رکھتا ہے۔
جے ڈی وینس کے مطابق امریکا ایسے اقدامات پر غور کر رہا ہے جو امریکی عوام کے مفاد میں ہوں۔ دوسری جانب رپورٹس کے مطابق سعودی عرب حوثیوں کے خلاف کارروائیوں میں امریکا سے تعاون کا خواہاں ہے۔
امریکی صدر ڈونلڈ ٹرمپ اور پینٹاگون کی جانب سے تاہم یہ مؤقف سامنے آیا ہے کہ امریکا حوثیوں کے خلاف براہِ راست فوجی کارروائی میں شامل نہیں ہوگا، البتہ سعودی عرب کو انٹیلی جنس اور اہداف سے متعلق معلومات فراہم کی جاسکتی ہیں۔
اس سلسلے میں امریکی فوجی کمانڈ سینٹکام کے سربراہ نے سعودی عرب کا دورہ کرکے سعودی ولی عہد محمد بن سلمان سے ملاقات بھی کی، جس میں حوثیوں کے حملوں کے بعد خطے کی صورت حال اور ممکنہ اقدامات پر تبادلہ خیال کیا گیا۔
یوں امریکا ایک طرف حوثیوں کے ساتھ براہِ راست رابطے میں ہے، جبکہ دوسری جانب سعودی عرب، متحدہ عرب امارات اور دیگر علاقائی اتحادیوں کے ساتھ بھی یمن کی صورت حال پر مشاورت جاری رکھے ہوئے ہے۔ تاہم حوثیوں کی جانب سے امریکی نائب صدر کے دعوے پر تاحال کوئی باضابطہ ردعمل سامنے نہیں آیا۔
