وزیراعلیٰ خیبرپختونخوا سہیل آفریدی کا پنجاب پولیس پر اغوا اور ویرانے میں چھوڑنے کا الزام

وزیراعلیٰ خیبرپختونخوا سہیل آفریدی نے الزام عائد کیا ہے کہ پنجاب پولیس نے انہیں اغوا کرکے بعد ازاں سڑک پر چھوڑ دیا۔ لکشمی چوک لاہور میں پی ٹی آئی کارکنوں سے گفتگو کرتے ہوئے ان کا کہنا تھا کہ یہ اقدام پنجاب حکومت اور پولیس نے کیا۔

سہیل آفریدی نے کارکنوں پر زور دیا کہ وہ اشتعال میں نہ آئیں اور پُرامن رہیں۔ اس سے قبل وہ مال روڈ ریگل چوک پر پولیس کی پریزن وین میں بیٹھ گئے اور کہا کہ پہلے ان کے کارکنوں کو رہا کیا جائے، پھر وہ آگے بڑھیں گے۔ پولیس کے مطابق، ان کے وین سے اترنے سے انکار پر گاڑی وہاں سے روانہ ہوگئی۔

خیبرپختونخوا کے وزیر اطلاعات شفیع جان نے بھی الزام عائد کیا کہ پنجاب پولیس نے وزیراعلیٰ کو گاڑی میں بٹھا کر ویرانے میں چھوڑ دیا اور کہا کہ منتخب وزیراعلیٰ کی تذلیل برداشت نہیں کی جائے گی۔

دوسری جانب پنجاب کی وزیر اطلاعات عظمیٰ بخاری نے ویڈیو شیئر کرتے ہوئے دعویٰ کیا کہ سہیل آفریدی خود پولیس وین میں جا کر بیٹھے تھے۔ انہوں نے اس معاملے کو ڈرامہ قرار دیتے ہوئے سہیل آفریدی کے مؤقف کو مسترد کردیا۔