وزیراعلیٰ کےپی سہیل آفریدی سمیت پی ٹی آئی کے 24 ارکان کے پاسپورٹ بلاک

اسلام آباد کی انسداد دہشت گردی عدالت نے وزیراعلیٰ خیبرپختونخوا سہیل آفریدی سمیت پی ٹی آئی کے 24 اراکین قومی و صوبائی اسمبلی کے پاسپورٹ بلاک کرنے کا حکم دے دیا۔ عدالت نے ایف آئی اے کو اگلے احکامات تک پاسپورٹ بلاک رکھنے کی ہدایت کی ہے۔

عدالت کے مطابق ملزمان پر ریاستی اداروں پر حملوں اور دہشت گردی کے فروغ سمیت سنگین الزامات ہیں، جبکہ تفتیشی افسر نے خدشہ ظاہر کیا کہ ملزمان قانونی کارروائی سے بچنے کے لیے بیرون ملک فرار ہوسکتے ہیں۔ ملزمان عدالت میں پیش بھی نہیں ہوئے اور عبوری ضمانت حاصل کرنے والے بعض ملزمان بھی تفتیش میں شامل نہیں ہوئے۔

پاسپورٹ بلاک کرنے کی درخواست تھانہ کوہسار میں درج مقدمے کے سلسلے میں پولیس کی جانب سے دائر کی گئی تھی۔ انسداد دہشت گردی عدالت کے جج ابوالحسنات محمد ذوالقرنین نے درخواست منظور کرتے ہوئے فیصلہ جاری کیا۔