ایلون مسک اور سام آلٹمین کی اے آئی کی تیز رفتار ترقی پر تشویش

ایلون مسک اور اوپن اے آئی کے سربراہ سام آلٹمین نے مصنوعی ذہانت کی کمپنی اینتھروپک کے سی ای او داریو اموڈے کے اے آئی کی تیز رفتار ترقی سے لاحق خطرات سے متعلق بیان کی حمایت کردی۔

ایلون مسک نے کہا کہ داریو اموڈے کی بات بالکل درست ہے، وہ خود بھی طویل عرصے سے مصنوعی ذہانت کے ممکنہ خطرات سے خبردار کرتے آرہے ہیں۔

سام آلٹمین نے بھی داریو اموڈے سے اتفاق کرتے ہوئے کہا کہ مصنوعی ذہانت کی ترقی کی رفتار کو مناسب انداز میں آگے بڑھانے کی ضرورت ہے۔

واضح رہے کہ داریو اموڈے نے خبردار کیا تھا کہ اے آئی کی تیز رفتار ترقی آئندہ 6 سے 12 ماہ میں پورے انٹرنیٹ کو ہائی جیک کرنے کی صلاحیت حاصل کرسکتی ہے، جس سے کھربوں ڈالر کا نقصان ہوسکتا ہے۔

اینتھروپک کے سی ای او نے کہا کہ اے آئی ماڈلز کی صلاحیتوں میں بہتری کی رفتار کم کی جانی چاہیے، تاہم ترقی اس کے باوجود تیز رہے گی اور اس اضافی وقت کو حفاظتی اقدامات کے لیے استعمال کیا جاسکتا ہے۔

انہوں نے بتایا کہ اینتھروپک بیرونی جانچ کرنے والوں کو ملازمین جیسی رسائی فراہم کرے گی تاکہ حفاظتی طریقہ کار کا جائزہ لیا جاسکے اور ممکنہ واقعات کی رپورٹنگ کی جاسکے۔ داریو اموڈے نے پوری اے آئی انڈسٹری سے بھی اسی طرح کے اقدامات کرنے کی اپیل کی۔