ایم ڈی واسا کا کلمہ چوک انڈر پاس اور لبرٹی مون سون کیمپ کا دورہ

لاہور(عمران اسلم) منیجنگ ڈائریکٹر واسا لاہور غفران احمد نے کلمہ چوک انڈر پاس اور لبرٹی مون سون کیمپ کا دورہ کرکے بارش کے دوران نکاسیٔ آب کے انتظامات کا جائزہ لیا۔

غفران احمد نے نشیبی علاقوں، انڈر پاسز اور اہم شاہراہوں پر نکاسیٔ آب کے آپریشن کا معائنہ کرتے ہوئے فیلڈ افسران کو بارشی پانی کی فوری نکاسی کے لیے اقدامات تیز کرنے کی ہدایت کی۔

ایم ڈی واسا نے کہا کہ شہریوں کو بارش کے پانی سے فوری ریلیف کی فراہمی جاری ہے اور فیلڈ عملہ مسلسل متحرک ہے۔ بجلی کی بندش والے علاقوں میں ڈسپوزل اسٹیشنز کو جنریٹرز کے ذریعے فعال رکھا جا رہا ہے تاکہ نکاسیٔ آب کا عمل متاثر نہ ہو۔

انہوں نے ہدایت کی کہ بارش کے آخری قطرے کی نکاسی تک تمام افسران اور عملہ فیلڈ میں موجود رہ کر نکاسیٔ آب آپریشن جاری رکھے۔