51 سال بعد گمشدہ بٹوہ مالک کو واپس مل گیا
کینیڈا میں ایک شخص کا گمشدہ بٹوہ 51 سال بعد حیرت انگیز طور پر اسے واپس مل گیا۔
رچرڈ گیلوری کا بٹوہ 1975 میں کینیڈا کے علاقے ڈارٹ ماؤتھ میں گم ہوگیا تھا۔ کئی دہائیاں گزرنے کے بعد ایک بڑھئی، میٹی گولڈ اسمتھ، کو ایک گھر کی مرمت کے دوران یہ بٹوہ فرش کے نیچے سے ملا۔
بٹوے میں رچرڈ گیلوری کا ڈرائیونگ لائسنس، ہائی اسکول اسٹوڈنٹ آئی ڈی، ہاتھ سے لکھا ہوا برتھ سرٹیفکیٹ، ایک ڈالر کا نوٹ اور تھیٹر ڈرامے کا ٹکٹ موجود تھا۔
میٹی گولڈ اسمتھ نے سوشل میڈیا کے ذریعے بٹوے کے مالک کو تلاش کرنے کی کوشش کی۔ ان کی پوسٹ رچرڈ کی اہلیہ ڈونا گیلوری تک پہنچی، جنہوں نے بٹوے میں موجود اشیا کی شناخت کرتے ہوئے تصدیق کی کہ یہ ان کے شوہر کا ہے۔
رچرڈ گیلوری نے بٹوہ واپس ملنے پر حیرت اور خوشی کا اظہار کیا۔ انہوں نے بتایا کہ انہیں 51 سال قبل بٹوہ گم ہونے کا واقعہ یاد تھا، تاہم بٹوے میں موجود کچھ چیزیں دیکھ کر وہ خود بھی حیران رہ گئے۔
ان کے مطابق انہیں یاد نہیں تھا کہ انہوں نے 1975 میں تھیٹر ڈرامہ دیکھا تھا۔ اپنے ہاتھ سے لکھے ہوئے برتھ سرٹیفکیٹ کو دیکھ کر بھی انہیں حیرت ہوئی اور وہ یہ سوچ کر حیران تھے کہ ان کے والدین نے یہ دستاویز انہیں کیوں دی تھی۔
