ایمانداری کا مظاہرہ کرنے والے ٹریفک وارڈن سہیل ڈوگر کی وزیراعلیٰ پنجاب سے ملاقات

لاہور کی ٹمبر مارکیٹ سے دورانِ پٹرولنگ بھاری نقدی والا بیگ ملنے کے بعد اسے مالک تک بحفاظت پہنچانے والے ٹریفک وارڈن سہیل وزیر ڈوگر نے وزیراعلیٰ پنجاب مریم نواز سے ملاقات کی۔

وزیراعلیٰ مریم نواز نے سہیل ڈوگر کی ایمانداری اور فرض شناسی کو سراہتے ہوئے انہیں شاباش دی۔

مریم نواز کا کہنا تھا کہ ٹریفک وارڈن سہیل ڈوگر کی ایمانداری اور فرض شناسی متاثر کن ہے، اگر ہر پاکستانی دیانتداری اور ایمانداری کو اپنائے تو ملک بہت آگے جاسکتا ہے۔

سہیل ڈوگر نے معمول کی پٹرولنگ کے دوران سڑک پر موجود بیگ اپنی تحویل میں لیا تھا، جس میں بھاری نقدی کے علاوہ ڈرائیونگ لائسنس اور دیگر ضروری کاغذات موجود تھے۔

ٹریفک وارڈن نے بیگ میں موجود دستاویزات کی مدد سے مالک کو تلاش کیا اور بیگ بحفاظت اس کے حوالے کردیا۔