ڈیبیو پر 92 میل فی گھنٹہ کی رفتار، مردان کے رضااللہ نے جو روٹ کو ٹھکانے لگا دیا
برمنگھم: پاکستان کے 21 سالہ فاسٹ بولر رضااللہ نے انگلینڈ کے خلاف اپنے ٹیسٹ ڈیبیو پر شاندار آغاز کرتے ہوئے کپتان اور انگلینڈ کے عظیم بلے باز جو روٹ کو اننگز کی چوتھی گیند پر آؤٹ کردیا۔
مردان سے تعلق رکھنے والے دائیں ہاتھ کے فاسٹ بولر نے اپنے پہلے دو اوورز میں 92 میل فی گھنٹہ تک رفتار حاصل کی اور اس دوران ان کی رفتار 89 میل فی گھنٹہ سے کم نہیں ہوئی۔ رضااللہ نے جو روٹ کو اندر آتی ہوئی گیند پر ایل بی ڈبلیو کرکے ٹیسٹ کرکٹ میں اپنی پہلی وکٹ حاصل کی۔
رضااللہ کی باؤلنگ نے انہیں پاکستان کے سابق عظیم فاسٹ بولر وقار یونس سے تقابل کا باعث بھی بنا دیا ہے۔ نوجوان فاسٹ بولر نے دن کے آخری حصے میں انگلینڈ کے اوپنر ایمیلیو گے کو بھی بولڈ کرکے اپنی دوسری وکٹ حاصل کی۔
رضااللہ کی ٹیسٹ اسکواڈ میں شمولیت پاکستان کرکٹ بورڈ کی جانب سے سیریز کے دوران کی گئی بڑی تبدیلیوں کے بعد ہوئی۔ ہیڈنگلے میں پہلے ٹیسٹ میں اننگز اور 103 رنز جبکہ لارڈز میں دوسرے ٹیسٹ میں 194 رنز سے شکست کے بعد پی سی بی نے ہیڈ کوچ سرفراز احمد کو عہدے سے ہٹا کر 7 کھلاڑیوں کو وطن واپس بھیج دیا تھا۔
رضااللہ ان 7 متبادل کھلاڑیوں میں شامل تھے اور ان پانچ کھلاڑیوں میں سے ایک تھے جنہیں پہلی مرتبہ قومی ٹیسٹ اسکواڈ میں شامل کیا گیا۔
رضااللہ نے فرسٹ کلاس کرکٹ میں بھی اپنی صلاحیتوں کا بھرپور مظاہرہ کیا۔ 2025-26 کے قائداعظم ٹرافی سیزن میں انہوں نے 8 میچز میں 30 وکٹیں حاصل کیں، جبکہ آل راؤنڈر کی حیثیت سے ایک نصف سنچری اور ایک سنچری بھی اسکور کی۔
ان کی صلاحیتوں نے بعد ازاں پی ایس ایل کی نئی ٹیم راولپنڈیز کے کوچ عبدالرحمان کی توجہ حاصل کی۔ قومی کرکٹ اکیڈمی میں پریکٹس کے دوران پی سی بی کے ہائی پرفارمنس ڈائریکٹر عاقب جاوید نے بھی رضااللہ کی باؤلنگ کو پسند کیا، جس کے بعد انہیں اگست کے آخر میں فاسٹ باؤلنگ کیمپ میں شامل کیا گیا۔
انگلینڈ کے خلاف تیسرے ٹیسٹ کے پہلے روز پاکستان نے صرف 133 رنز بنائے، جس کے جواب میں انگلینڈ نے کھیل ختم ہونے تک 4 وکٹوں کے نقصان پر 156 رنز بنا لیے تھے۔
رضااللہ کی دو وکٹیں اگرچہ میچ کا رخ تبدیل کرنے کے لیے کافی نہیں تھیں، تاہم ان کی تیز رفتار اور جارحانہ باؤلنگ نے پاکستان کو ایک ایسے شعبے میں امید کی کرن فراہم کردی ہے جس کی ٹیم کو طویل عرصے سے ضرورت تھی۔
