امریکا سے پاکستان کے 36 قیمتی نوادرات واپس کر دیے گئے

پاکستان سے چوری کرکے امریکا اسمگل کیے گئے 36 نوادرات حکومت پاکستان کے حوالے کر دیے گئے، جنہیں اب پاکستان لایا جائے گا۔

نیویارک کاؤنٹی ڈسٹرکٹ اٹارنی آفس میں منعقدہ تقریب کے دوران نیویارک میں پاکستان کے قونصل جنرل عامر احمد اتوزئی نے نوادرات کی واپسی سے متعلق معاہدے پر دستخط کیے۔

واپس کیے گئے نوادرات میں چوتھی صدی عیسوی سے تعلق رکھنے والی یکشی کی گرے شِسٹ شخصیت جبکہ 35 ٹیراکوٹا فرٹیلٹی فگرز شامل ہیں، جن کا تعلق تقریباً 2700 سے 3000 قبل مسیح کے دور سے ہے۔

قونصل جنرل عامر احمد اتوزئی نے کہا کہ چوری شدہ نوادرات کی قانونی واپسی مستقبل کی نسلوں کو پاکستان کی قدیم تہذیب اور ثقافتی ورثے سے آگاہی کا موقع فراہم کرے گی۔